Ginpahayag ni Vice President Sara Duterte nga politikal ang motibo sang reklamo nga physical injuries kag grave threat batok sa iya utod nga si Davao City 1st District Representative Paolo “Polong” Duterte.
Suno kay Sara, ginpaguwa ang isyu agud tabunan ang kapaltahan sang administrasyon nga matuman ang saad sini nga P20 kada kilo nga bugas.
Madumduman nga nagpasaka sang reklamo si Kristone John Patria, isa ka negosyante kag residente sang Davao City, batok kay Rep. Duterte sa Department of Justice (DOJ) nga physical injuries kag grave threats.
Gapati si Sara nga ang reklamo pareho sang impeachment move batok sa iya kag imbestigasyon sa PrimeWater nga ginapanag-iyahan sang pamilya Villar, kun sa diin isa lang man ka porma sang political attack.
Nagapadayon subong si Sara sa iya pagpangampanya sa Zamboanga City agud suportahan ang kandidatura sang Team Zamboanga nga ginapamunuan ni mayoral candidate Khymer Olaso, kag nakit-an man sa amo nga okasyon sanday Senator Imee Marcos kag Robin Padilla.
Sa pihak nga bahin, wala pa nagpagwa sang opisyal nga pahayag si Rep. Paolo Duterte bangud nga wala pa siya nakabaton sang kopya sang reklamo.
Sa subong, padayon nga nagalapata ang video sa social media nga nagapakita kun paano ginpahadlok ni Rep. Paolo Duterte ang isa ka lalaki sa isa ka bar sa Davao City.
Pahayag ni Paolo nagakadapat anay nga ma-authenticate ang nasambit nga isyu antes ini magkomento.
