Naka-full alert na ang Iloilo Police Provincial Office (IPPO), isa ka semana antes ang Mayo 12, 2025 midterm elections bilang kabahin sang ila preparasyon sa seguridad.
Sa interview sang Bombo Radyo kay Police Major Rolando Araño, Spokesperson sang Iloilo Police Provincial Office, iya ginpahayag nga nagahulat pa sila sang dugang nga augmentation personnel halin sa regional office agud masiguro ang husto nga kadamuon sang mga pulis nga ma-assign sa mga polling precincts.
Suno kay Araño, may yara lang sila nga gina-fix sa iban nga bagay agud maplastar na ang tanan mga deployment.
Ginpasiguro man ni Araño nga may contingency plan ang IPPO kun may kakulangan sa police personnel, agud malikawan ang ano man nga problema sa adlaw sang eleksyon.
Gin-athag man sang natungdan nga sa subong wala pa sila sang may nabataon nga report ukon reklamo tuhoy sa vote buying, apang padayon ang ila coordination sa COMELEC kag sa mga partner agency.
Nagapanugyan man si Araño sa mga pumuluyo nga magbinuligay kag gilayon nga mag-coordinate sa mga kapulisan kun may yara sang mga problema sa tion sang pagboto agud nga may kalinong kag matalalunsay nga 2025 midterm elections.
