Ginplastar sang Institute of Contemporary Economics ang pila sa mga nagapanguna nga rason kun ngaa madamo sang nagakatabo nga mga aksidente sa dalanon sa pungsod nga nag-utas sang madamo nga kabuhi.
Sa interview sang Bombo Radyo kay Joseph Ladrido, Executive Director sang amo nga institute, iya ginpahayag nga kinahanglan nga mahangpan sang publiko nga indi sa tanan nga tion nga ang mga drivers sang nagakaasidente nga salakyan ang dapat basulon.
Suno sa iya, madamo sang contributory factors sa mga aksidente kag ini ang ginalakipan sang indi maayo nga sitwasyon sang mga dalanon, depektibo nga mga traffic signs, mga naga-park nga salakyan, kag madamo nga mga obstructions sa dalan.
Pahayag ni Ladrido, dako ang kakulangan sang gobyerno ilabi na ang mga natungdan nga ahensya sang gobyerno kaangay sang Department of Public Works and Highways agud nga mapabilin kuntani nga standard kag husto ang pag-construct sang mga dalanon.
Dugang niya, madamo sang mga polisa nga dapat bag-uhon sang gobyerno bilang epektibo nga tikang agud makabulig sa pagpangita sang solusyon sa sini nga mga problema.
Pila sa mga posible nga himuon diri amo ang maid-id nga pagsunod sa standards sa infrastructure remediation kag sa ano man nga road construction, pag-reaallocate sang mayorya sang annual General Appropriations Act budgets sa road kag land transport infrastructure
remediation, paghimo sang layi nga nagatukod sang Road Transport Safety office nga naga-consolidate sang tanan nga aspeto sang Transportation Safety policymaking kag pag-supervise sini.
Sa bahin naman sang Land Transportation Office, ginsiling ni Ladrido nga napaslawan ang ahensya nga dedikaran ang ila mandato ilabi na sa enforcement sang traffic laws, rules and regulations.
Apang ginakilala man sini ang LTO nga naka-produce sang mapuslanon nga driver’s manual nga nagabulig sa mga drivers.
