Ginkilala sang Catholic Bishops’ Conference of the Philippines (CBCP) nga isa si Pope Leo XIV sa pinakamadasig nga napilian nga Santo Papa sa bug-os nga kasaysayan sang Simbahang Katolika.
Suno kay CBCP spokesperson Fr. Jerome Secillano, apat lang ka balota ang gin-obra sang mga cardinal antes ginpili si Cardinal Robert Prevost bilang bag-o nga lider sang simbahan.
Gin-athag ni Secillano nga posible nga may ideya na ang mga cardinal parte kay Cardinal Prevost antes pa magsugod ang conclave, kag nadunggan man sang tanan ang iya background sa general congregations.
Ginpahayag man nga isa sa mga rason nga madasig ini nga nga napilian amo ang iya posisyon bilang head sang Dicastery for Bishops, isa ka mataas nga katungdanan sa Vatican.
Ini nga opisina amo ang naga-ugyon sa Santo Papa sa pagpili kag pag-appoint sang mga obispo sa bilog nga kalibutan.
Dugang pa ni Fr. Secillano, ang pagpili sang ngalan nga “Leo” sang bag-o nga Santo Papa isa ka paathag sang iya pasidungog sa mga imol kag sa mga mamumugon, nga ginatagan sang pagpakilala kag pagrespeto.
Ginpaathag man sang CBCP nga kaupod ang bug-os nga komunidad sang Katoliko sa Pilipinas sa pagbaton kag pagsuporta sa bag-o nga lider sang Simbahang Katolika.
