Nakumpiska sang mga operatiba sang Bureau of Customs (BOC) ang anum ka pakete nga may sulod nga ginadudahan nga droga nga nagabalor sang P4.43 milliom sa Ninoy Aquino International Airport (NAIA).
Suno sa pahayag sang BOC, na-intercept ang shipment sa Central Mail Exchange Center sang airport, kun sa diin nasapwan ang 1,330 ka tableta sang ecstasy kag 362 gramos sang heroin.
Ginpahayag pa sang ahensya nga ang mga ilegal nga droga ang naghalin sa Ireland, Netherlands, kag Thailand.
Ginpanugyan sang BOC nga gintago ang mga droga sa mga pakete nga gin-misdeclare nga mga produkto para sa skincare kag mga gamit sa plumbing.
Ang operasyon ginpatigayon upod ang Philippine Drug Enforcement Agency (PDEA) kag ang NAIA Inter-Agency Drug Interdiction Task Group (NAIA-IADITG).
Ang mga nakumoiska nga mga droga ang ginturn-over na sa PDEA para sa dugang nga imbestigasyon kag legal nga tikang suno sa Republic Act 9165 ukon Comprehensive Dangerous Drugs Act of 2002 kag Republic Act 10863 ukon Customs Modernization and Tariff Act.
Anum ka pakete nga may sulod nga ginadudahan nga droga, nakumpiska sang mga operatiba sang Bureau of Customs
