Gin-akusaran sang United Nations aviation agency ang Russia nga may kahilabtanan sa pagbunggo sang Malaysia Airlines Flight MH17 sa Ukraine nga nagresulta sang kamatayon sang 298 ka mga pasahero kag crew.
Ginkumpirmar sang International Civil Aviation Organization (ICAO) nga nakabase sa Montreal nga may yara sang pag-on nga basehan ang duha ka mga pungsod nga may pinakadamo nga napatay sa nasambit nga insidente batok sa Russia.
Ang mga pungsod ang ginalakipan sang Australia kag Netherlands.
Nahibaluan nga wala nakatuman ang Russian Federation sang ila obligasyon sa idalum sang international nga layi tuhoy sa pag-crash sang Flight MH17 sang 2014.
Madumduman nga sang Hulyo 17, 2014, ang Malaysia Airlines Boeing 777 halin Amsterdam padulong sa Kuala Lumpur sang ginbunguan sang Russian-made BUK missile sa ibabaw sang Donetsk region, Ukraine.
Ginpabutyag sang Australia kag Netherlands ang ila kasubo kag panawagan sa Russia nga magbaton sang responsibilidad.
Suno sa Australian government, ini isa ka makasaysayan nga tikang sa pagpangita sang kamatuoran kag hustisya para sa mga biktima sa nasambit nga insidente.
Ginpahayag ni Dutch Foreign Minister Caspar Veldkamp nga bisan indi makabawi ang desisyon sang ICAO sa kasakit sang mga pamilya, importante ang ini nga tikang para sa hustisya kag accountability.
Sa masunod nga semana, pagaplanohan sang ICAO Council kun paano ipatuman ang legal nga redress kag kun paano mapilit ang Russia nga mag-umpisa sang negosasyon sa Australia kag Netherlands.
