Ginhingadlan ang isa ka deputy prosecutor sa International Criminal Court (ICC) nga amo ang magabulos sa pagpanguna sa kaso ni former President Rodrigo Duterte kasunod sang pag-leave ni ICC Prosecutor Karim Khan.
Ini amo si Deputy Prosecutor Mame Mandiaye Niang nga isa sa duha nga gin-assign nga magsalo sa leadership, management kag administration sa Office of the Prosecutor (OTP) samtang nga wala si Khan.
Pahayag sang ICC, apisar may mga pagbag-o, ipadayon sini ang implementasyon sang ila mandato nga magdala sang hustiya para sa mga biktima sang Rome Statute crimes sa bisan diin man nga kabahin sang kalibutan.
Base sa record sang korte, tumandok sang Senegal si Niang kag na-eleher nga Deputy Prosecutor sa korte sa The Hague, Netherlands sang Disyembre 2021.
May yara ini sang masangkad nga international experience sa United Nations system bangud sa nagkalain-lain nga posisyon nga gin-agyan sini lakip na sa International Criminal Tribunal for Rwanda (ICTR); Regional Representative sang United Nations Office on Drugs and Crime (UNODC) sa Southern Africa; kag Judge sa Appeals Chamber sang International Criminal Tribunal para sa former Yugoslavia kag International Criminal Tribunal for Rwanda.
Matandaan nga temporaryo nga nagpaog sa pwesto si Prosecutor Khan sa tunga sang imbestigasyon sang United Nations Office of Internal Oversight Services batok sa iya bangud sa ginaalegar nga sexual misconduct. Ini nga alegasyon ang nauna na nga ginpanginwala ni Khan.
Marso 11 sang gindakop si Duterte kag gindala sa detention facility sa Netherlands bangud sa ginaalegar nga crimes against humanity bangud sa extrajudicial killings nga naangot sang ginpatuman sini ang war on drugs.
Naka-schedule ang confirmation of charges sa Septyembre 23.
