Gin-anunsyo sang Department of Education (DepEd) nga ginmanduan ni Secretary Sonny Angara ang mga regional kag division offices nga madasig kag epektibo nga mag-recruit sang 16,000 sang bag-o nga mga manunudlo nga kinahanglanon para sa pagbukas sang School Year 2025-2026.
Suno sa DepED, ang una nga 16,000 teaching positions nga nahimo sa pag-apruba sang Department of Budget and Management (DBM) ang makabulig sa pagnubo sang pagginutok sa hulot-klasehan kag makapahagan-hagan sang trabaho sang mga public teachers sa bilog nga pungsod.
Gin-athag man sang ahensya nga ang ini nga tikang ang ginatutukan man ang kakulangan sang mga manunudlo nga may husto nga espesyalisasyon, labi na sa kindergarten, elementarya, kag sa mga subject-specific areas sa junior kag senior high school.
Suno kay Angara, importante ang madasig nga pag-assign sang bag-o nga mga manunudlo agud mangin tayuyon kag epektibo ang pagbukas sang klase.
Ang School Year 2025-2026 ang magasugod sa Hunyo 16, 2025 kag magatapos sa Marso 31, 2026.
