Gindepensahan ni U.S. President Donald Trump ang desisyon sang iya administrasyon nga punggan ang mga foreign student sa Harvard University, pagkatapos nga temporaryo nga ginsuspendi sang korte ang nasambit nga aksyon.
Sa post ni Trump, iya ginkwestyon kun ngaa wala ginahambal sang Harvard nga halos 31% sang ila mga estudyante amo ang mga foreign student kun sa diin indi man ini makabulig sa pungsod.
Gindugang pa niya nga may katungdanan ang gobyerno nga hibaluon kon sin-o ang mga foreign students nga naga-eskwela sa Amerika, ilabi nga ang Harvard ginahatagan sang bilyon-bilyon ka dolyar halin sa pondo publiko.
Matandaan nga ginsuspende ni Homeland Security Secretary Kristi Noem ang pribilehiyo sang Harvard nga magbaton sang mga international students, bangud sa indi paghatag sini sang datos angot sa visa holders nga ginadudahan nga may kahilabtanan sa mga bayolente nga aktibidad.
Apang, gilayon man ini gin-untat sang korte matapos magpasaka sang kaso ang Harvard nga nagsiling nga ang aksyon sang gobyerno ang wala sa layi, kun sa diin indi makatarungan, kag unconstitutional.
Ginapasui nga ang nasambit nga crackdown kabahin sang mas malapad nga kampanya sang administrasyon ni Trump batok sa mga unibersidad sa U.S., lakip na ang pag-freeze sang $2.2 billion nga grant kag $60 million nga kontrata sa Harvard.
