Mamangkot anay si Interior Secretary Jonvic Remulla sa International Criminal Court (ICC) kun pasugtan sini ang Pilipinas nga magpadala sang consul agud makapanumpa si former President Rodrigo Duterte.
Ini bangud naka-detain gihapon ang anay president sa The Hague, Netherlands apang nagdaog ini sa 2025 elections bilang alkalde sang Davao City batok sa kasumpong nga si Karlo Nograles.
Pahayag ni Remulla, ginakilala nila ang pagdaog ni Duterte kag naproklamar na gani ini sang Commission on Elections (Comelec).
Apang dugang sini, antes maka-assume sa opisina, kinahanglan nga maka-sumpa gid ang former president.
Samtang wala pa ang amay nga Duterte, ang iya anay bata nga si Sebastian Duterte nga outgoing mayor subong kag na-eleher bilang vice mayor sa 2025 elections amo ang magaserbe nga acting mayor sa Davao.
Marso 11 sang gindala sa Europa si Duterte matapos gindakop sa Pilipinas sa alegasyon nga nakakomiter ini sang crimes against humanity bangud sa iya pagpatuman sang drug war.
Natalana ang confirmation of charges sa Septyembre 23.#
