Ginpresentar na sang National Bureau of Investigation (NBI) si anay kongresista Arnolfo “Arnie” Teves Jr. sa media subong nga adlaw, matapos siya madala pauli sa Pilipinas halin sa Timor-Leste.
Nag-abot si Teves diri sa pungsod sang Huwebes sang gab-i, duha ka tuig matapos sa brutal nga pagpatay kay Negros Oriental Governor Roel Degamo kag siyam pa ka mga indibidwal sa insidente nga natabo sang Marso 4, 2023.
Sa pagpanguna sang NBI, ginpa-atubang si Teves sa media samtang kaupod ang iya iloy nga si Zenaida Teves kag abogado nga si Atty. Ferdinand Topacio.
Madumduman nga nadakpan si Teves sang nagligad nga tuig sa isa ka driving range sa Dili, kapital sang Timor-Leste, apang ginpunggan sang korte ang iya extradition.
Nahibaluan nga gin-anunsyo sang gobyerno sang Timor-Leste sang Miyerkules sang gab-i ang plano nga pag-deport kay Teves, bangud ginalantaw nga peligroso ang iya presensya sa ila seguridad.
Ginsiling pa nga kabahin ini sang ila preparasyon para sa full membership sa Association of Southeast Asian Nations (ASEAN) kag responsibilidad nga magbinuligay sa mga legal nga isyu.
Pagkatapos sang proseso sang booking kag medical examination, yara na subong sa kustodiya sang NBI si Teves, kag ginapangatubang sini ang mga akusasyon nga may kaangtanan sa pagpatay kay Degamo.
Suno sa imbestigasyon, samtang nagapanghatag sang bulig si Degamo sa iya balay sa Pamplona, may anom ka armado nga tawo nga may mga dala sang riffle kag nakasuksok ang mga ini sang uniporme military kag nagsulod sa compound kag nagpalupok sang Marso 4, 2023.
Ginaalegar nga kabangdanan sang insidente amo ang tensyon pagkatapos sang 2022 eleksyon, sa diin si Degamo ang gindeklarar nga daog batok kay Henry Teves, utod ni Arnolfo.
Matandaan nga ginpahalin man si Teves sa House of Representatives sang 2023.
Sa pareho nga adlaw sang deportation, nag-upload ang anak ni Teves nga si Axl sang video sa social media nga nagapakita sang pagdakup sa iya amay, kag ginpahayag nga daw gin-“kidnap” ini.
Samtang si Janice Degamo, asawa ni anay Gobernador Degamo, nagpasalamat sa pagdakop kay Teves kag nagsiling nga isa ini ka “maayo nga tikang padulong sa hustisya.”
Sa pihak nga bahin, ginkalipay man ni Teves nga Nakita niya liwat ang iya Iloy nga si Zenaida Teves matapos ang duha ka tuig.
Nagapanawagan man ini nga kun pwedi mapadasig ang proseso sang iya kaso bangud nagapati ini nga matinlo ang iya konsensya.
