Nagpanawagan ang Iloilo City Government sa Department of Health (DOH) nga tugutan ang Uswag Molecular Laboratory nga magpatigayon sang local testing para sa mpox ukon monkeypox kasunod sang pagtaas sang kumpirmado nga kaso sa syudad.
Sa interview sang Bombo Radyo kay Mayor Jerry Treñas, iya ginpahayag nga madugay na nga handa ang syudad para sa mpox testing humalin pa sang 2022 sang una nga marecord ang kaso sa Pilipinas.
Suno sa iya, may bastante nga kagamitan kag personnel ang laboratory.
Apang ang kulang lamang amo ang test kits halin sa Research Institute for Tropical Medicine (RITM) sa Manila.
Nahibaluan nga ang amo nga laboratoryo ang nahamtang sa Barangay San Pedro, Molo, Iloilo City kag una ini nga ginbuksan sang 2022 kag gin-gamit para sa COVID-19 testing.
Isa ini sa pinakadako nga laboratoryo sa pungsod kag accredited sang DOH kag RITM bilang Level 2 biosafety facility.
Base sa pinakaulihi nga data, may apat na kumpirmado nga kaso kag duha ka suspected cases sang mpox sa syudad.
Ginapahanumdom naman sa publiko nga ang mpox ang mapasa paagi sa malapit nga pisikal nga kontak, ilabi na sa pagpakighilawas.
Makalalaton ini paagi sa direkta nga pagtapik sa mga pilas ukon likido sang lawas sang pasyente.
Padayon naman ang panawagan ni Mayor Treñas sa publiko nga mag-obserbar gid sang mga safety protocol agud malikawan ang paglapta sang balatian sa syudad.
