Ginbatak na sang Department of Foreign Affairs (DFA) sa Level 3 ang crisis alert level sa Israel kag Iran.
Nagakahulugan ini nga may yara na sang voluntary repatriation nga matabo samtang nagapadayon ang baslanay sang bombahanay sang duha ka nasambit nga mga nasyon sa Middle East.
Kadungan sini, nagpanawagan ang ahensya sa mga Pilipino nga ikonsiderar nga mag-avail sang ginatanyag sang gobyerno nga mapabalik sila sa Pilipinas.
Sandig sa data sang gobyerno, may yara sang 30,000 ka mga Pinoy sa Israel kun sa diin kadam-an ang nagatrabaho bilang caregivers; samtang masobra naman sa 1,100 sa Iran.
Kadungan sini, nag-abiso man ang gobyerno nga, “Travel by Filipinos to both these countries is highly discouraged due to the ongoing crisis and the actual closure of their airspace and seaports.”
Para sa mga interesado nga magpauli, mahimo makontak ang embahada sang Pilipinas kun sa diin man sila nga pungsod.
Nahibaluan nga isa ka semana na ini nga baslanay sang missile strikes kag wala sang patimaan nga maga-untat sa labing madali nga tion.
Walo naman ka mga Pilipino sa Israel ang nalakip sa nasamaran kun sa diin isa ang nagapabilin sa kritikal nga kondisyon.
As of press time, may 187 na nga naghingyo sang repatriation, kag sa sini nga numero, 26 ang naka-schedule na para sa first batch sang pagbiya sa Israel nga mahimo matabo sa masunod nga duha tubtub tatlo ka adlaw.#
