Nagtaliwan na sa edad nga 78-anyos ang longtime columnist kag talent manager nga si Lolit Solis.
Sa isa ka Facebook, gin-share sang actor nga si Niño Muchlach ang laragway ni Solis nga may caption, “Paalam Nanay Lolit Solis.”
Sunod nga nag-post ang actor kag politician nga si Jolo Revilla nga nagakumpirma man sang balita: “Salamat sa lahat ng pagmamahal at pagsuporta mo sa aming buong pamilya lalo na kay papa. Salamat sa pagaalaga mo sa akin noong ikaw ay tumayo bilang aking manager noong ako ay artista pa.”
Wala pa sang mga detalye nga ginpaguwa sa rason sang iya kamatayon kag impormasyon sa iya nga lubong.
Sang Abril, ginpakigbahin sini nga nagapaidalom siya sa dialysis treatments sang makaduha ka beses sa kada semana kag apat ka oras sa kada session. Nag-ako man ini nga naga-eksperyensya siya sang mental lapses kag physical weakness nga nagapabudlay sa iya adlaw-adlaw nga hulag.
Natawo si Lolit sang Mayo 20, 1947 sa Manila. Nangin household name siya bilang host kag interviewer partikular na sa Startalk nga nag-ere sang 1995 tubtub sang 2015.
Sa sulod sang malawig nga tion, nangin prominente ang papel sini sa Philippine entertainment industry, nangin kilala sa commentary sini, kag nangin suod ang relasyon sa madamo nga mga artista.#
