Ginklaro sang Philippine Coast Guard (PCG) nga indi “planted” ang mga sako nga na-recover sa Taal Lake samtang nagapadayon ang pagpangita sa missing sabungeros.
Pahayag ni PCG spokesperson Captain Noemi Cayabyab, ang diving operations nga ginapatigayon isa ka legitimate operation kag kabahin sang isa ka pormal nga imbestigasyon.
Dugang sini, tuyo sang ila operasyon nga makabulig-hatag sang hustisya kag mabukaran ang kamatuoran sa kaso sang mga manugbulang nga ginpang-kidnap, ginpangpatay, kag gin-alegar nga ginpangtagbong sa lake sang 2021 kag 2022.
“Itinatanggi ito ng PCG [na planted lang ang mga nakitang sako sa Taal Lake]. Ang layunin ng bawat diving operations namin ay makapagbigay ng hustisya at katotohanan. Nawa’y mawala ang mga ganitong espekulasyon dahil bawat sisid ng PCG, buhay nila ang nakataya,” suno kay Cayabyab.
Nahibaluan nga lima na ka sako ang nakuha sang PCG divers halin sa inspeksyon tubtub sa aktwal nga pag-dive. Ipaidalom pa ini sa forensic examination kag sa DNA test agud makumpirma kun tul-an sang tawo ang unod kag kun may kaangtanan bala ini sa kaso sang missing sabungeros.
“Continue po ang diving operations hanggang may na retrieve, Naka-depende rin ang tagal ng diving operation sa weather, current, at alert level ng Taal Volcano,” dugang sang PCG official.
Sini nga Domingo, nag-release ang PCG sang underwater video footage sang ila nga search and retrieval operation sa tunga sang espekulasyon sang publiko sa sini nga isyu.
Ini nga mga operasyon ang ginhimo kasunod sang ginpangbulgar sang whistleblower nga si Julie “Dondon” Patidongan alias Totoy nga didto ginpangtagbong ang mga bangkay. Ginatudlo sini nga mastermind sa krimen ang negosyante nga si Atong Ang apang ginapanginwala naman ini sang natungdan.#
