Ginpahayag ni Pres. Ferdinand “Bongbong” Marcos Jr. nga handa na ang gobyerno sa pag-atubang kag paghatag sa mga kinahanglanon sang mga pumuluyo nga apektado sang Bagyong Crising.
Sa iya personal nga inspeksyon sa warehouse sang Department of Social Welfare and Development (DSWD) subong nga aga, nakita sang Presidente ang ginahimo nga repacking sang mga family food packs nga ipanghatag sa mga naapektuhan sang bagyo.
Suno kay Marcos, ginagamit na karon ang bag-o nga makinarya sa pag-repack sang mga relief goods, nga nagalakip sang health kits, sanitary kits, family dress kits, kag cooking sets. Bangud sini, mas nagapadali ang proseso sang pagpreparar sang ayuda.
Ginpabugal man ni Marcos ang mga balde nga may water filter nga mahimo gamiton bilang bulutangan sang tubig nga apisar indi limpyo, mahimo na mainom pagkatapos sang filtration process.
Sa karon, may yara na sang kapin tatlo (3) ka million nga family food packs nga nakareserba.
Dugang pa sini, may standby fund man ang DSWD nga nagakantidad sang P2.9 billion agud may masandigan kun kinahanglanon pa sang dugang nga pondo.
