Ginkumpirma sang Vatican nga nakatawag na si Israeli Prime Minister Benjamin Netanyahu kay Pope Leo isa ka adlaw matapos gin-atake sang Israel ang naga-isahanon nga Catholic church sa Gaza.
Ang amo nga pagpang-atake ang nagpatay sa tatlo ka mga tawo kag 10 naman ang nasamaran lakip ang isa ka pari.
Suno sa Holy See, ginsulit sang Santo Papa ang iya paghingyo para sa ceasefire kag pagtapos na sang gyera sa Gaza.
Nagpabutyag man ang Santo Papa sang kahangawa sa makahalanusbo nga sitwasyon sang mga tawo sa amo nga teritoryo sa Palestine.
Ginpahayag an sini nga kinahanglan nga proteksyunan ang lugar nga ginapangamuyuan, ang mga tumulu-o kag ang tanan nga tawo sa Palestinian territories kag Israel.
Sa tawag naman ni Netanyahu kay US President Donald Trump, gin-ako sini nga nagsala lang sila sa pag-atake sa simbahan.
Suno sa Israel Defense Forces, indi ang simbahan ang ila nga target sang nagpatigayon sila sang operational activity.
Ginpasalig man sang militar nga gina-imbestigaran na ini subong.
Nahibaluan nga ang napilasan nga parish priest nga si Father Gabriel Romanelli amo ang nagapanguna sa Parokya sa Gaza sa halos tatlo na ka dekada.
Kilala ang simbahan nga ini bangud masami ini anay gina-istorya ni Pope Francis, kag halos adlaw-adlaw nga ginatawagan agud magpangamusta samtang nagapadayon ang gyera.
