Nagpabutyag sang tuman nga pagpangasubo ang lider sang Simbahan Katolika nga si Pope Leo XIV sa damlag lang nga pag-atake sang Israel sa isa ka simbahan sa Gaza.
Nag-apelar man ini sa pagpa-untat sang ginatawag niya nga “barbarity” nagapadayon nga giyera sa Gaza.
Suno sa report, sang Huwebes sang aga gin-igo sang militar sang Israel ang Holy Family Church sa Gaza, nga amo ang ginapasilungan sang ginabulubanta nga 600 ka mga pumuluyo.
Tatlo ang napatay sa insidente kag madamo pa ang pilason, lakip na ang kura paroko sang simbahan nga si Fr. Gabriel Romanelli.
Sa iya mensahe sang Domingo matapos ang Angelus prayer sa iya nga summer residence sa Castel Gandolfo, ginpangalanan kag ginpangamuyuan sang Santo Papa ang tatlo ka napatay nga sanday Saad Issa Kostandi Salameh, Foumia Issa Latif Ayyad, kag Najwa Ibrahim Latif Abu Daoud.
Ginpahayag niya nga malapit ini sa iya kasingkasing kag ginhatagan niya sang pagpakig-unong ang ila pamilya.
Ginsiling sang Santo Papa nga ini nga hitabo isa lang sa madamo na nga mga military attacks nga naga-target sa mga sibilyan kag sa mga lugar sang pagsimba sa Gaza.
Liwat siya nga nag-apelar para sa isa ka malinong nga solusyon kag pagtapos sang gamo.
Ginganyat man sang Santo Papa ang international community nga tumanon ang mga layi sang humanitarian law kag respetuhon ang obligasyon nga protektahan ang mga sibilyan.
Gintapos ni Pope Leo ang iya mensahe sa isa ka panawagan sa mga Kristyano sa Middle East.
Ginkilala niya ang kasubo sang ila kahimtangan kag ginpasalamatan sila bilang mga matinumanon nga saksi sang pagtuo sa tunga sang kabudlayan.
Suno sa ulihi nga data, masobra na sa 2 million nga mga residente sa Gaza ang napilitan nga magpalagyo bangud sa giyera nga subong nagasulod na sa ika-22 ka bulan.
