Nagsumiter na sang ila mga counter-affidavit sa National Police Commission (Napolcom) ang 12 ka aktibo nga miyembro sang Philippine National Police (PNP) nga ginaalegar nga may kaangtanan sa kontrobersyal nga kaso sang mga nadula nga manugbulang nga ginapahayag ginpangtagbong sa Taal Lake.
Ini nga mga dokumento ginpasaka bilang sabat sa administratibo nga reklamo nga gin-file ni Julie Patidongan, nga mas kilala sa alyas nga “Totoy”, nga amo ang nagbulgar sang insidente.
Suno sa Napolcom, sang Hulyo 15, ginpatawag sang Inspection, Monitoring and Investigation Service (IMIS) ang mga ginatudlo nga pulis kag ginmanduan nga magsumiter sang ila sabat sulod sang lima ka adlaw.
Suno kay Napolcom Vice Chairman and Executive Officer Rafael Vicente Calinisan, pagatun-an na sang IMIS ang mga ginpasaka nga reklamo upod ang mga counter-affidavit sang mga respondent agud ma-assess ang kabug-usan nga kaso.
Wala pa sang ginpaguwa nga dugang nga detalye si Calinisan angot sa kaundan sang mga affidavit, apang iya ginpahayag nga ang kabug-usan sini lunsay mga pagpanginwala sang mga pulis nga naangot sa insidente.
Padayon pa ang imbestigasyon kag ginahulat ang resulta sang evaluation sang Napolcom.
