[Trigger Warning: Mention of Mental Health Problem]
Wala na sang plano ang pamilya nga magpasaka pa sang kaso batok sa isa ka iloy nga amo ang nagsulod sang iya kaugalingon nga bata sa drum sa atubang sang ila balay sa Barangay Sipitan, Tigbauan, Iloilo.
Suno ini kay Police Captain Alfred Mansoy, hepe sang Tigbauan Municipal Police Station, sa interview sang Bombo Radyo, Hulyo 21. Gin-refer man ini sang pulis sa Municipal Social Welfare and Development Office (MSDWO) para sa case study.
Kaina sang nasapwan na lamang ang bangkay sang bata kun sa diin ang ginatudlo may kahimuan amo ang iloy nga si Mary Jane, 27.
Sa interview kay Wilma Ojerio, punong barangay sang Sipitan, Tigbauan, ginpahayag sini nga sang Domingo, Hulyo 20, ginhagad sang live-in partner si Mary Jane nga magsimba sila apang wala nagsunod ang babaye kag nagpabilin lang sa ila balay upod ang ila bata.
Pagkauli sang lalaki, wala na niya nakit-an si Mary Jane kag ang ila nga bata.
Gilayon nila ginpangita ang mag-iloy tubtob sang gab-i sang Domingo kag ila nakit-an kainang aga sang Hulyo 21 si Mary Jane nga nagapanago sa kawayanan nga ginabanta may 300-metros ang kalayuon halin sa ila balay.
Suno pa kay Ojerio, may ginabatyag na daan si Mary Jane nga problema sa panghuna-huna antes pa sini nga insidente, kag posible nga nakuha niya ini nga kondisyon pagkatapos niya magbata.
Pahayag pa sang barangay official, wala gid nakaagi pa-check up sa doktor si Mary Jane bangud sang kapigaduhon sang ila kabuhi.
Nahibaluan nga ang bata nga napatay amo ang naga-isahanon nga anak ni Mary Jane sa iya ikaduha nga live-in partner. Sa una sini nga live-in partner, may yara siya sang duha pa ka kabataan nga didto na sa pagtatap sang lalaki.
Sa separado nga interview sang Bombo Radyo kay Police Captain Mansoy, iya ginpahayag nga gin-ako mismo ni Mary Jane nga siya ang nagbutang sang iya bata sa drum, apang wala siya nakahibalo kon ngaa nahimo niya ini.
Sang nasapwan ang bata nagapalamuti na ini kag mabaho na. Ginabanta nga kulang na lang sang tunga ka dangaw agud mapuno na ang tubig sa drum.
Base sa pagpangusisa sang Bombo Radyo, ang bata nga lalaki ang maga-selebrar pa lang kuntani sang iya una nga kaadlawan sa Byernes, Hulyo 25.#
(With reports from: Bombo Krylle Melliza)
