Ginpaathag ni Mayor Raisa Treñas ang iya suporta sa Catch, Neuter, Vaccinate, and Release (CNVR) program sang City Veterinary Office sa Iloilo City, apang ginpabutyag man niya nga kinahanglan ini nga i-review kag tan-awon sa case-to-case basis, ilabi na sa mga lugar nga may dalagku nga populasyon kag problema sa basura.
Sa interview sang Bombo Radyo kay Mayor Treñas, iya ginpahayag nga samtang isa ka maayo kag makatawhan nga inisyatibo ang CNVR program, kinahanglan nga husto ang pagpatuman sini agud malikawan ang mas madamo pa nga isyu sa kahilwayan sang mga sapat sa mga barangay.
Suno sa alkalde, isa sa mga ginapanguna nga pagpanghangkat amo ang mga ido ukon kuring nga nagalapta sang basura, ilabi na gid ang mga plastic kag diaper. Ginklaro niya nga suportado niya ang programa, apang dapat hatagan man sang lugar kun diin ibalik ang mga sapat matapos nga ma-neuter kag mabakunahan.
Ang CNVR strategy ginadumalahan sang City Veterinary Office kag kabahin sini ang humane catching sang mga layaw nga ido kag kuring, sterilization, rabies vaccination. Bisan pa man nga kilala ini nga ethical solution sa sobra nga populasyon sang layaw nga sapat, ginpabutyag sang alkalde nga ang kahilwayan sang mga sapat sa wala sang monitoring posible nga magresulta sa dugang nga problema sa mga lugar nga may mataas nga populasyon.
Base sa datos sang syudad, 6,130 na ka sapat ang nabakunahan samtang 185 na ang na-neuter. Ginaplano man ni Mayor Treñas nga makigsapol siya sa mga animal welfare advocates agud mapabaskug pa ang koordinasyon kag mapadasig ang maayo nga implementasyon sang programa.
