Natumba ang isa ka poste nga ginatukod para sa connection sang ginapatindog nga Iloilo Terminal Market sa may kanto sang Fuentes de Leon, kag nakadamage sa duha ka pwesto sa palibot.
Sa interview sang Bombo Radyo kay Joffe Frontada, tag-iya sang barber shop nga naapektuhan, ginpahayag sini nga ang poste natumba kag natimingan nga nag-igo sa iya pwesto kag sa isa pa ka sari-sari store nga naga baligya sang panakot. Wala sang napilasan apang grabe ang kulba sang mga tawo sa palibot.
Ginsaysay ni Frontada nga kagapon lang gintakud ang poste kag gab-i pa lang, iya ginremind nga posible ini matumba bangud nga galagpok-lagpok na. Ginkumpirmar sini nga wala gid siya nagsala matapos nga natumba ini kag naglatagok pa sa atop sang iya pwesto.
Dugang pa, isa ka tag-iya sang stall ang gindala sang ambulansya bangud sa sobra nga kakulba.
Ginpahayag sang mga vendors nga abi nila may linog nga nagluntad bangud sa kabaskug sang pagtupa sang poste.
Gilayon naman nga ginrespondehan sang awtoridad ang natabo nga insidente agud makuha ang natumba nga poste.
