Pormal na nga nag-file sang reklamo ang walo ka myembro sang OPM girl group nga BINI batok sa isa ka wala ginhingadlan nga persona sa Office of the City Prosecutor sa Hall of Justice sa Sta. Rosa, Laguna.
Ginkumpirmar sang ila abogado nga si Atty. Joji Alonso, nga ang respondent ang nagkomiter sang “unjust vexation” sa idalom sang Article 287 may kaangtanan sa Section 4 (b) sang RA 10175 ukon ang Cybercrime prevention act of 2012.
Ang reklamo ang nag-ugat sa gin-edit nga video nga kun sa diin makit-an ang mga myembro sang BINI nga nagatilaw kag naga-rate sang Filipino street food.
Ang original version sang video ang may kalawigon nga 20 tubtob 25 minutes, apang ang gin-edit kag gin-upload nga bersyon ang nagalawig lamang sang duha ka minutos.
Ginpahayag pa sang abogado nga dako ang epekto sang video sa mental kag emotional nga kahimtangan sang mga myembro sang BINI, bangud sini napilitan sila nga magsaka sa legal nga lihok agud maprotektahan ang ila kaugalingon batok sa cyber harassment kag paglapas sa ila reputasyon.
