Makatulublag kag halos indi mapatihan ang isa ka case report nga ginpaguwa sang United States National Library of Medicine kaangot sa isa ka lalaki nga nadiskubrehan nga may kutsilyo sa iya dughan sa sulod na sang walo ka tuig.
Ini nga lalaki naga-edad sang 44-anyos kag tumandok sang Tanzania sa East Africa.
Nangayo ini sang bulig sa mga doktor matapos nakit-an sini ang nana nga nagaguwa sa iya nga right nipple.
Wala siya sang na-eksperyensyahan nga pagpalanakit sang dughan, kabudlay sa pagginhawa, ubo, ukon hilanat, apang gin-ako sini nga walo ka tuig ang nakaligad, na-involve siya sang isa ka away kag nakaangkon sang samad sa iya nga nawong, likod, dughan, kag tiyan.
Ginhatagan lang siya ang first aid halin sa primary health facility kag gintahi ang iya mga pilas, apang wala na sang body scans nga ginhimo bangud limitado man ang pasilidad sa ila nga lugar.
Apang sang nagguwa na ang nana, ginpa-X-ray ang lalaki, kag didto nakit-an sang mga doktor ang metallic object nga isa gali ka kutsilyo sa tuo nga bahin sang iya nga dughan. Gilayon nga gin-operahan ang lalaki kag ginkuha ang kutsilyo nga napalibutan na sang nana kag necrotic tissue.
Gin-monitor ang kondisyon sang lalaki kag ginpaguwa man sa ospital makaligad ang 10 ka adlaw.
Bisan pa nga nag-recover ini sang mayo, nagakahangawa ang researchers nga may risgo nga dala ang halos isa ka dekada nga pagtinir sang kutsilyo sa iya lawas nga mahimo pa magresulta sa kamatayon.
“Large retained intrapulmonary foreign bodies are associated with complications such as inflammation, tissue necrosis, and abscess formation, as seen in our patient. However, our patient survived for eight years without experiencing any overt symptoms,” suno sa case report.
“The prolonged asymptomatic period likely resulted from the body’s ability to encapsulate the foreign body within a fibrous capsule, limiting inflammation and tissue damage. This mechanism, seen in similar cases, helps contain foreign materials and delay clinical manifestations,” pahayag sini.
Ini nga adaptive response suno sa report ang mahimo nga magatabon sang seryoso nga kumplikasyon.
Kasunod sini, gina-engganyo sa report ang “increased awareness and improved protocols for trauma management, safe surgery and safe anaesthesia in low-resource settings” kag dapat ang mga pasyente ang i-refer gid gilayon sa higher-level healthcare facilities nga amo ang makahatag sang comprehensive diagnostic kag surgical care nga kinahanglanon.#
