Gin-abandonar sang isa ka mag-asawa sa airport ang 10-anyos nga bata nila nga lalaki matapos madiskubrehan nga expired ang passport sini.
Natabo ini sa El Prat Airport sa Barcelona, Spain.
Suno sa air traffic controller, nakit-an sang mga pulis ang bata nga nagaisahanon.
Sang ginpamangkot siya, nagsabat ang bata nga ginbilin siya sang ginikanan niya nga nagpadulong sa Morocco para sa bakasyon.
Bangud diri, wala ginpalupad ang eroplano nga ginsakyan sang iya ginikanan.
Sang ila gin-istorya ang ginikanan, nakibot ang airport official sa sabat nila nga sang nadiksubre nga indi valid ang passport sang ila nga bata, nagdesisyon sila nga bayaan na lang ini sa airport.
Nagtawag na lang sila sa ila paryente nga sugaton ang bata sa airport kag nagsakay sila nga mag-asawa sa eroplano.
Nagapangatubang subong ang mag-asawa sang kaso nga pag-abandonar sa ila nga anak kag pagtuga sang delay sa flight.
Ipaidalom man sila sa dugang nga imbestigasyon agud hibaluon ang ila silot bangud sa nahimo nila sa ila anak.
