Gin-isa-isa ni Sarah Discaya sa Senate Blue Ribbon Committee hearing ang iya ginapanag-iyahan nga 28 ka luxury cars kag kun pila ang ila nga mga balor.
Lakip diri ang isa ka Rolls Royce; isa ka Maybach; 20 ka Bentley; isa ka Benz G63; duha ka Cadillac Escalade SUV; duha ka GMC SUV; kag isa ka Suburban.
Suno sa iya, sang nagligad nga tuig lang niya ginbakal ang Rolls Royce bangud nanamian siya sa dala sini nga payong.
Sa iya pag-atubang sa upper chamber, ginpahayag ni Discaya nga ang iya tanan nga luxury cars ang naangkon paagi sa duha ka importer-dealers nga amo ang AutoArt Models kag Frebel Enterprises. Wala ini nagasanto sa iya nauna nga statement sa isa ka vlog nga masobra sa 40 luxury cars ang yara sa ila kag pila sa ila ang imported.
Paathag sini kay Senate President Pro Tempore Jinggoy Estrada, 28 lang ang luxury cars kag may “service cars” nga nakapangalan sa kumpaniya.
Indi man cash basis ang pagbakal sang malahalon nga salakyan suno sa iya kundi installment gid lamang.
Si Discaya ang tag-iya sang Alpha and Omega Gen. Contractors and Development Corporation nga nag-ako nga may siyam siya ka construction companies nga naka-secure sang deal sa gobyerno, apang suno sa iya, wala siya sang kahilabtanan sa ghost projects.
Nahibaluan nga nalakip ang Discaya-linked firms sa 15 contractors nga ginbuyagyag ni President Ferdinand R. Marcos Jr. nga nag-corner sang P100 billion ukon 20 percent sang kabilugan nga P545-billion flood control projects sa bilog nga pungsod.
