Ginatun-an subong sang Iloilo City Government ang masunod nga tikang agud mahibaluan kun ang flood mitigation structure sa Barangay Mohon, Arevalo amo gid bala ang rason sang pagbaha sa pila ka barangay sang syudad kag Oton, matapos ang ocular inspection sang Phase 1 sang proyekto kaupod ang City Engineer’s Office, Office of the Building Official, City Environment and Natural Resources Office, Department of Environment and Natural Resources kag si Oton Mayor Sofronio Fusin Jr.
Sa bahin ni Punong Barangay Rico Francis Acap, ginpahayag niya nga sang wala pa natukod ang proyekto wala naga sulod ang baha sa ila barangay, apang sang bagyo Crising kag Dante, nasaksihan nila nga sa baylo magdala sang benepisyo, mas nagdulot pa ini sang pagbaha.
Base sa rekord, ang Phase 1 nagalakip sang 300 metros nga flood mitigation structure nga may balor P90,929,717.93, kag ginpatuman sang St. Gerard Construction General Contractor and Development Corporation.
Samtang si Mayor Raisa Treñas nagpasalig nga padayunon sang city government ang koordinasyon sa mga eksperto halin sa UP para makakuha sang scientific-based judgement kag matumbok kun ini nga proyekto amo gid bala ang nagapalala sang baha.
Ginpahayag man sini nga plano nga himuon bike lane ukon alagyan sang ambulance ang dalan sa pihak sang istruktura, apang indi ini mahimo tungod sang mga obstruction sa tunga sang dalan.
