Gintukod sang Iloilo City Government ang Infrastructure Coordination Committee agud nga mangin klaro, maayo ang plano, kag wala sang pag-usik sang pondo para sa mga proyekto nga pang-imprastraktura nga ginahimo sa syudad.
Nakasaad ini sa Executive Order No. 084, Series of 2025 nga ginpaguwa ni Mayor Raisa Treñas subong nga Martes, Septyembre 16.
Sa idalom sini nga order, gina-require ang tanan nga infrastructure projects sa syudad nga magkuha anay sang Certificate of Coordination antes ang implementasyon.
Sa Section 5 sang EO, nakabutang nga iga-isyu lamang sang alkalde ang Certificate of Coordination kun may yara na sang endorsement sang committee. Ini nga certificate amo ang igalakip sa aplikasyon para sa mandatory permits kag clearances halin sa nanuhay-tuhay nga city departments.
“No infrastructure projects, either horizontal or vertical, shall proceed without the certificate of coordination,” kabahin sang order.
Nakabutang sa order nga sakop sini ang tanan nga proyekto nga pang-imprastraktura sa syudad, temporaryo man ukon permanente, kag bisan pa nga ang nag-implementar sini amo ang national government agencies, offices, kag government corporations.
Sa statement sang alkalde sa iya pagpaguwa sang EO, ginsiling sini nga tuyo sang order nga organisado ang mga proyekto kag wala naga-doble ang trabaho; mangin transparent kag accountable ang mga ahensya kag proyekto; protektado ang mga pumuluyo kag ang palibot; kag mas mangin madasig kag matalunsay ang implementasyon.#
(Photo: Raisa Treñas/FB)
