Siling nila, indi matakos ang mga bagay nga mahimo mo kun ikaw nagahigugma.
Amo gani nga indi gid mabasol ang isa ka Lola sang nagpalangga ini sa isa ka lalaki nga iya nakilala bilang isa ka astronaut.
Sosyal ang lalaki, kag syempre, todo-kilig man ini nga senior citizen sa northern Hokkaido island sa Japan bangud sang ila adlaw-adlaw nga komunikasyon. Sa padayon nila nga pag-chat, nagpati gid si Lola sa tanan nga ginapanghambal sang lalaki, bisan nga wala man niya ini nakit-an sa personal.
Sang ulihi, nagka-problema ang lalaki. Nanugid siya kay Lola nga ara siya sa spaceship, ugaling, “under attack” siya kag nagakinahanglan sang oxygen.
Nagpangayo ini sang bulig sa tigulang nga babaye nga magbayad online para nga mabaklan siya sang oxygen, kag sa kahadlok sang Lola nga basi kun indi na makaginhawa ang iya pinalangga, abaw, nagpadala man siya sang 1 million yen ukon katumbas sang masobra sa P382,000.
Ang mabudlay ugaling, matapos nga napadala ang kuwarta, wala na sang mensahe ang lalaki kag indi na sigurado si Lola kun nakabakal ini sang oxygen nga kinahanglan sini.
Sa malip-ot nga istorya, wala natabo ang “happily ever after” nga amo ang ginalauman sang tigulang.
Base sa pulis, kag santo sa gin-report sang Sapporo Television Broadcasting (STV), na-scam ang senior citizen.
“It’s such a ridiculous story and there are so many things to criticise her for, but it is sad there are people who believe these sorts of stories and are deceived,” sandig sa isa ka komento sa story sang STV.
Dugang sang isa, “It’s hard to believe this is not a comedy sketch. They say love is blind, but this is just too blind.”
Ang Japan amo ang may second-oldest population sa kalibutan kasunod sa Monaco, base sa data sang World Bank, kag ang mga may edad na nga mga tawo kaangay sa sini nga babaye amo gid ang masami nga mga biktima sang kaangay sini nga pagpang-into.
Magluwas sa romance scam, nagapaandam man ang mga pulis nga maghalong gid sa mga tawo nga nagapakilala nga myembro sang pamilya kag nagapangayo sang kuwarta paagi sa pagpakuno-kuno nga may yara sang emerhensya.
