Nakaguwa na si Bagyo Opong sa Philippine Area of Responsibility (PAR) base sa latest update sang Philippine Atmospheric, Geophysical and Astronomical Services Administration (PAGASA).
Sa 11:00 a.m. bulletin sang weather bureau, ginpahayag nga nakit-an ang sentro sang bagyo sa 645 km nakatundan sang Sangley Pt, Cavite City, Cavite.
Dala sang bagyo ang kabaskugon sang hangin nga 120 km/h malapit sa sentro kag pagmadlos nga tubtub sa 150 km/h. Nagahulag ini pa-nakatundan naaminhan-nakatundan sa kadasigon nga 35 km/h.
Wala na sang anuman nga lugar nga napaidalom sa Tropical Cyclone Wind Signal.
Sa pihak sini suno sa ahensya, ang Southwest Monsoon ukon Habagat nga ginapabaskog ni Opong ang magadala sang “strong to gale-force gusts” ilabi na sa coastal kag upland areas sa Luzon, Western Visayas, kag Negros Occidental.
Base sa track and intensity forecast, magahulag ang bagyo pa-nakatundan naaminhan-nakatundan pakadto sa northern Vietnam.
“Considering these developments, the public and disaster risk reduction and management offices concerned are advised to take all necessary measures to protect life and property. Persons living in areas identified to be highly or very highly susceptible to these hazards are advised to follow evacuation and other instructions from local officials,” kabahin sang pahanumdom sang PAGASA.
Antes nagbiya ang Opong, lakip sa ginlaslasan sini amo ang Western Visayas. Ginbaha ang Iloilo City kag ang 31 ka mga munisipalidad sa probinsya sang Iloilo bangud sang mamunog nga ulan nga dala sini.#
