Personal nga gin-asikaso sang actress-host nga si Kim Chiu ang pagbakal sang mga construction materials para sa mga biktima sang magnitude 6.9 nga linog sa Cebu.
Ginpuno sini ang duha ka 10-wheeler trucks sang mga materyales agud nga makabulig nga matukod liwat ang mga naguba nga mga balay.
Magluwas sa pag-upod sa warehouse, hands-on man ang aktres sa mga paperworks para sa donasyon.
Nagdako si Kim sa Cebu, kag natabuan man nga yara sa amo nga lugar ang taping sang iya nga latest project sang natabo ang linog sang Martes sang gab-i, Septyembre 30.
Antes kay Kim, ang iya co-star sa “The Alibi” nga si Zsa Zsa Padilla ang nagkadto man sa Capitol Command Center agud magdonar sang ready-to-eat food packs.
Naghatag naman ang host-comedienne nga si Melai Cantiveros sang P100,000 sa isa ka grupo sa amo nga probinsya nga naglunsar sang fundraising project.
May iban pa nga celebrities kag personalities nga naghatag sang bulig kag nagpanawagan sang suporta kag pagpangamuyo para sa mga Cebuano samtang naga-amat-amat bangon gikan sa trahedya.
Base sa Office of Civil Defense, nagsaka na sa 73 ang numero sang patay kag masobra naman sa 3,000 ang na-rekord nga aftershocks.#
