Nagpadala sang relief goods ang Philippine Coast Guard (PCG) District Western Visayas sa mga apektado sang magnitude 6.9 nga linog sa Cebu.
Ini kabahin sang donation campaign nga ginhimo sang PCG District Western Visayas kaupod ang mga local stakeholders, volunteers, civic partners kag government agencies agud makabulig sa mga biktima sang 6.9 magnitude nga linog.
Sa interview sang Bombo Radyo Iloilo kay Commander Richard Gura, Station Commander sang Coast Guard Station Iloilo, iya ginpahayag nga ginkarga ang goods sa BRP Corregidor. Lakip diri ang food packs, bottled water, hygiene kits, kag medical supplies.
Nagapanawagan man si Commander Gura sa publiko nga kun may yara pa sang luyag maghatag sang bulig ukon donasyon, mahimo lang nga makipag-angot sa opisina sang Coast Guard District Western Visayas sa Bo. Obrero, Lapuz, Iloilo City ukon sa Coast Guard Station Iloilo sa Fort San Pedro, Brgy. Concepcion, Iloilo City.
Sa latest report sang National Disaster Risk Reduction and Management Council (NDRRMC), nagdangat na sa 68 ang patay bangud sa linog sa Cebu.
Sa subong, naka-record na ang Philippine Institute of Volcanology and Seismology (Phivolcs) sang 4,581 aftershocks nga may kabaskugon humalin sa 1.0 tubtob 5.1.
Padayon naman nga gin-abisuhan sang ahensya ang publiko nga mangin alerto bangud apisar nga ginalauman nga maghagan-hagan na masami nga aftershocks, posible sa gihapon maka-record sang mabaskog nga aftershocks.
