Nagahulag ang Severe Tropical Storm Paolo padulong sa direksyon sang southern China.
Sandig ini sa 11:00 sa aga nga bulletin sang state weather bureau, Oktubre 4.
Ulihi nga nakit-an ang sentro sang bagyo sa kalayuon nga 440 km nakatundan sang Sinait, Ilocos Sur samtang dala ang kabaskugon sang hangin nga 110 km/h malapit sa sentro kag pagmadlos nga tubtub sa 135 km/h.
Nagahulag ini pa-nakatundan naaminhan-nakatundan sa kadasigon nga 20 km/h.
Wala naman sang areas sa Luzon nga napaidalom pa sa bisan ano nga wind signal.
Sa track forecast, magapadayon sa paghulag ang bagyo sa direksyon nga pa-nakatundan naaminhan-nakatundan padulong sa southern China. Samtang nga yara pa ini sa West Philippine Sea, mahimo ini magbaskog liwat kag magbalik sa Typhoon category.
Alas singko sa kaagahon kaina sang ginkumpirma sang bureau nga nakaguwa na sa Philippine Area of Responsibility (PAR) ang amo nga bagyo.
Sa pihak nga bahin, sa latest monitoring sang DOST-PAGASA, mataas ang tyansa nga mangin Tropical Depression sa masunod nga 24 oras ang Low Pressure Area (LPA) nga yara sa guwa sang PAR. As of 8:00 a.m., na-monitor ini sa kalayuon nga 2,300 kilometros Nakatundan Naaminhan-Nakatundan sang Extreme Northern Luzon.
