Nagapadayon subong ang imbestigasyon sang Molo Police Station matapos ang nagluntad nga shooting incident kagab-i, Oktubre 5, 2025, sa Barangay Salvacion, Habog-habog, Molo, Iloilo City.
Ginabulong naman ang biktima nga ginkilala kay alyas ”Bangi”, 25-anyos, residente sang Barangay Compania Central, Molo, Iloilo City.
Sa interview sang Bombo Radyo kay Barangay Tanod Charlie Sabiano, iya ginpahayag nga samtang yara siya sa sagwa sang Barangay Hall kag nagapahuway, nakabati sila una sang isa ka lupok sang pusil kag pagkalipas sang lima ka segundo, may nabatian pa gid sila sang duha ka sunod-sunod nga lupok.
Suno pa kay Sabiano, gilayon sila nga nagtindog kag nakita ang pila ka motorsiklo nga nagguluwa . Pagkatapos sang pila ka minuto, may isa ka Grab driver nga nagpalapit kag nagsugid nga may tawo nga natumba kag nagahuray-ad sa dalan kag duguan.
Pagkadto nila sa lugar, ila nakita ang biktima nga nagaginhawa pa, nagahulag pa ang tiil kag apang madamo sang dugo sa nawong kag sa likod sang biktima.
Gintawgan nila gilayon ang kapulisan, apang suno kay Sabiano, nadugayan ang pagresponde bangud pakadto ang mga pulis sa isa pa ka insidente sa Barangay Calumpang, Molo.
May lain nga patrol unit ang nakaabot kag gilayon nila nga gindala ang biktima sa pinakamalapit nga ospital.
Dugang pa ni Sabiano, kilala niya ang biktima bilang isa ka salawayon kag indi masaligan nga bata, kag kawatan. Ginsiling man niya nga bag-o lang ini nakagwa sa prisohan mga duha na ka bulan ang nakaligad sa kaso nga pagpangawat./JDS
(Reported by Bombo Jomar Villa/Bombohanay Bigtime)
