Liwat nga ginpahanumdom sang Office of Civil Defense (OCD) Western Visayas sa publiko kun daw ano ka-importante ang pag-upod sa mga ginahanda nga simultaneous earthquake drills.
Ini ang kasunod sang mga asud-asud nga linog sa Pilipinas lakip na ang 7.4 magnitude nga nagtay-og sa Manay, Davao Oriental kahapon sang aga kag ginsundan sang 6.8 magnitude pagkagab-i.
Sa interview sang Bombo Radyo kay Regional Director Raul Fernandez, ginpahayag sini nga may yara sang Nationwide Simultaneous Earthquake Drill (NSED) nga ginahimo sa kada tatlo ka bulan sa Pilipinas. Ini amo ang pagpreparar sang ahensya sa mga tawo ilabi na sa posible pag-abot sang ‘The Big One’ ukon ang potensyal nga 7.2 magnitude nga linog.
Sa nagligad nga binulan, lakip sa ginhimo sa sini nga drills amo ang aerial damage assessments, hazardous materials response, search and rescue sa nagkalarumpag nga mga estruktura, jailbreak scenarios, vehicle extrication, kag evacuation sa mga kabataan nga may learning difficulties.
Suno kay Fernandez, ini nga sahi sang aktibidad amo ang magahanda sa mga tawo kun ano ang ila himuon kun mabatyagan na ang pagtay-og. Paagi sini suno sa iya, masaulo na ang himuon.
Nahibaluan nga sa natabo kahapon sa Davao, Intensity III ang nabatyagan sa Iloilo City, apang indi kaangay sa nagligad nga linog nga ang sentro sa Bogo City, Cebu, wala sang na-rekord nga dalagko nga halit sa mga imprastraktura sa Western Visayas.#
