Nagpaguwa na sang iya statement si Department of Public Works and Highways (DPWH) Usec. Arrey Perez matapos nag-resign sa posisyon.
Pahayag sini, ginpili niya nga manaog sa pwesto, bangud nakahibalo siya nga kasunod sang “malicious insinuations” batok sa iya, mahimo na lamang ini nga hampang sa pulitika.
Pahayag sini, indi siya magpasugot nga gamiton siya agud nga maliso ang atensyon gikan sa kun ano ang dapat nga tutukan.
“Let the fight against corruption continue and let me continue to do my work in it from a position of integrity,” kabahin sang statement sini.
Kaina sang hapon sang ginkumpirma ni DPWH Secretary Vince Dizon nga nagpasa si Perez sang irrevocable resignation agud mahatagan sang ligwa ang imbestigasyon kag agud nga malikawan nga mangin distraction samtang nga yara siya sa ahensya.
Una naman nga ginpasiguro ni Dizon nga magapadayon ang imbestigasyon kay Perez apisar pa nga nagpanaog na ini sa iya nga posisyon.
Matandaan nga ginbulgar ni Batangas Representative 1st District Rep. Leandro Leviste ang pangalan ni Perez kaina sang aga matapos ginhangkat siya ni Dizon nga magsapubliko sang mga pangalan sang DPWH officials nga may link sa mga kontraktor.
Una naman nga gin-athag ni Leviste nga “multiple sources” ang iya ginbasehan apang ini ang verbal gid lamang nga mga impormasyon.#
