Ginpanginwala sang actress nga si Bea Alonzo ang nagalapta nga mga huring-huring nga siya kuno ang nagabusong sa bata nila sang iya nobyo nga si Vincent Co.
Sa isa ka post sa Instagram, nagpasalamat si Bea sa tanan nga mga nagpadala sang mensahe kag pagtamyaw sa iya kaadlawan.
Kadungan sini, ginklaro man sang aktres nga wala siya nagabusong, kasunod sang nagviral nga litrato.
Ang nasambit nga picture ang ginkuha sa isa ka simple nga pagtililipon nga ginpreparar sang iya mga staff, sa diin makita nga ginatabunan sini ang iya nga tiyan sang bulak.
Matandaan nga sang Agusto, ginkumpirmar ni Bea nga may relasyon na sila ni Vincent Co matapos ang pila ka bulan nga mga huring-huring angot sa ila nga duha.
Ini bangud man nga masami sila nga makit-an sa nagkalain-lain nga mga event.
Suno kay Bea, mas ginapili niya nga ipabilin nga pribado ang iya personal nga kabuhi, ilabi na ang iya love life.
