Liwat nga maga-atubang si anay House Speaker Martin Romualdez sa hearing sang Independent Commission for Infrastructure (ICI) sa masunod nga semana may kaangtanan sa gin-aalegar nga irregularidad sa mga flood control projects, suno kay ICI Executive Director Brian Keith Hosaka.
Natalana ang ikatatlo nga hearing ni Romualdez sa Myerkules, Oktubre 22.
Matandaan nga sang nagligad nga semana, nagbisita si Romualdez sa opisina sang ICI sa Taguig agud magtambong sa closed-door hearing sang commission.
Suno kay Hosaka, wala ginpangalanan ni Romualdez ang bisan sin-o nga personalidad nga nalakip sa gin-aalegar nga korapsyon, apang gin-mention niya ang pila ka mga mamalidha nga may kahilabtanan sa national budget.
Ginpanginwala man sang anay House Speaker nga nagbaton siya sang kickbacks halin sa mga proyekto nga may kaangtanan sa flood control.
Ginsiling sang ICI nga ipatawag nila ang mga ginhingadlan nga indibidwal, apang suno kay Hosaka, magadepende pa ini sa resulta sang internal nga pag-istoryahanay sang commission.
