Ginkumpirma sang Independent Commission for Infrastructure (ICI) nga indi makatambong si former House Speaker Martin Romualdez sa masunod nga hearing sang panel para sa imbestigasyon sa mga anomaliya sa flood control projects.
Sandig sa ginpaguwa nga media advisory, magapaidalom ang anay House Speaker sa medical procedure. Wala gindetalye kun para sa ano ang procedure kag kun kamusta ang ikaayong lawas sang kongresista.
Una gin-anunsyo nga Oktubre 22 kuntani ang schedule sang hearing. Isapubliko lang ugaling sang panel kun san-o ang masunod nga schedule.
Madumduman nga sang Martes, Oktubre 14, sang una nga nag-atubang si Romualdez sa ICI matapos nga gin-imbitaran siya agud nga maplastar ang iya ihibalo bilang anay Speaker. Kaangot ini sa natabo nga national budget insertions amo man sa mga iregularidad sa mga proyekto sang Department of Public Works and Highways (DPWH).
Sa una nga hearing, ginpanginwala sang anay House leader ang mga alegasyon nga nakabaton siya sang kickback sa implementasyon sang government infrastructure projects.
Lakip si Romualdez sa mga mamalidha nga gin-implicate sa infrastructure corruption scandal. Gin-akusaran siya sang former security consultant ni resigned Ako Bicol partylist Rep. Zaldy Co nga nagbaton sang daku nga kantidad sang kuwarta bilang kickbacks.#
