Ginbuyagyag subong nga adlaw ni Senadora Risa Hontiveros ang kopya sang iya Statement of Assets, Liabilities and Net Worth (SALN) para sa tuig 2024, bilang kabahin sang iya padayon nga panawagan para sa transparency kag accountability sa serbisyo publiko.
Sa iya ginpagguwa nga SALN, nagapakita nga may yara si Hontiveros sang total assets nga nagalab-ot sa P20 million, may liabilities nga malapit sa P900,000, kag net worth nga halos P19 million, base sa data tubtob Disyembre 31, 2024.
Lakip sa iya mga ginpanag-iyahan amo ang tatlo ka residential properties nga iya naangkon sang 1991, 1999, kag 2003.
May yara man siya sang mga personal nga kagamitan kaangay sang cash deposits, duha ka salakyan, furnitures, alahas, kag equity sa mga installment purchases.
Gindeklarar man sang Senadora ang isa ka car loan nga nagabalor sang halos P900,000 sa idalom sang iya mga utang.
Sa dugang nga impormasyon, ginbuyagyag ni Hontiveros nga isa siya ka stockholder sang dive resort nga Planet Dive Inc. halin pa sang 1999, myembro sang New Rural Bank of San Leonardo Inc. nga naka-base sa Nueva Ecija sang 2010, kag director sang La Luna Corp. halin pa sang 2002.
Una siya nga napili bilang Senador sang 2016 kag napilian liwat para sa ikaduha nga termino sang 2022.
Base sa mga petsa sang acquisition sang iya mga propedad kag assets, makit-an nga ang kadam-an sang iya manggad naangkon antes pa siya nagsulod sa posisyon sa gobyerno.
