Ginkumpirmar sang Department of Public Works and Highways (DPWH) nga wala sang mga dokumento nga may kahilabtanan sa imbestigasyon sa iregularidad sa flood control projects ang nadalahig sa sunog nga nagluntad sa ila opisina kahapon, Oktubre 22.
Suno sa DPWH, ang nasunog nga building amo ang Bureau of Research and Standards (BRS) nga nahamtang sa Quezon City.
Base sa report sang Bureau of Fire Protection – National Capital Region (BFP-NCR), naglab-ot sa third alarm ang sunog antes ini napalong sang takna 1:49 sang hapon.
Suno sa DPWH, ang BRS amo ang ahensya nga responsable sa pagbusisi, pagtuon, pilot-testing, kag pagtukod sang mga polisa para sa mga proyekto nga pang-impraestruktura sang gobyerno.
Wala naman sang nasamaran sa insidente, suno pa sa ahensya.
Base sa inisyal nga imbestigasyon, ang kalayo nag-umpisa sa isa ka computer unit sa sulod sang Materials Testing Division.
Padayon ang hugot nga imbestigasyon agud mahibaluan ang iban pa nga mga kabangdanan sang sunog kag malikawan ang kapareho nga insidente sa palaabuton.
(REMULLA)
Samtang, sa isa ka separado nga pahayag, ginmando ni Ombudsman Jesus Crispin Remulla ang gilayon nga pagpakigsapol sa National Bureau of Investigation (NBI) kag Bureau of Fire Protection (BFP) agud imbestigaran kag klaruhon kun may posibilidad nga hungod ini nga ginsunog.
