Gin-acquit sang Sandiganbayan si former Senate President kag subong Chief Presidential Legal Counsel Juan Ponce Enrile sang iya nabilin nga graft charges sa ginaalegar nga pagsaylo sang P172.8 million nga public funds nga naangot sa pork barrel scam.
Gin-acquit man sang Special Third Division sang anti-graft court ang former chief of staff ni Enrile nga si Gigi Reyes., kag ang negosyante nga si Janet Lim Napoles sa 15 graft counts sa ginpatigayon nga promulgasyon sang kaso subong nga adlaw, Oktubre 24.
Suno sa Sandiganbayan, napaslawan ang prosekusyon nga pamatud-an nga guilty “beyond reasonable doubt” ang mga ini.
Ang kaso nag-ugat sa Priority Development Assistance Fund (PDAF) ukon pork barrel scandal sang 2013.
Sa idalom sang scheme, ang PDAF allocations ginasaylo sa network sang peke nga nongovernmental organizations nga ginadumala ni Napoles.
Sanday Enrile, Reyes, kag Napoles ang na-indict sang 2014 bangud sa plunder kag gin-akusahan sa pagbulsa sang P172.8 million sa kickbacks.
Si Napoles ang gin-convict sa plunder sang 2018 nga may kaangtanan naman sa pork barrel funds ni anay Senator Ramon Revilla Jr.
Gin-acquit man sang Sandiganbayan sang Oktubre 4, 2024, si Enrile sa kaso nga plunder.
Magluwas kay Enrile,sanday Revilla kag Senator Jinggoy Estrada ang ginkasuhan man sang plunder angot sa PDAF scam apang gin-acquit man.
