Nagapanawagan si House Deputy Minority Leader Leila de Lima kay Presidente Ferdinand Marcos Jr. nga ipagwa sa publiko ang iya Statement of Assets, Liabilities, and Net Worth (SALN), kag hangkaton man ang iya gabinete nga himuon man ini.
Suno kay De Lima, kun seryoso ang administrasyon sa kampanya batok sa korapsyon, dapat umpisahan sang Presidente sa iya kaugalingon.
Pahayag pa niya, all-out ang pagpakigbato kontra korapsyon kun wala sang ginatago kag wala man sang “sacred cows” ukon ginaproktektahan.
Dugang pa sang kongresista, ang pagpagwa sang SALN amo ang pamatuod sang panindugan sa transparency, kasunod sang ginaduso sang Presidente nga Freedom of Information Act.
Ginpunto man ni De Lima nga ini ang tion ni Marcos nga pamatud-an nga lain siya kay anay Presidente Rodrigo Duterte, nga wala ginsapubliko ang iya SALN.
Matandaan nga ginkakas ni Ombudsman Jesus Crispin Remulla ang mga restriksyon sa pag-access sang SALN sang mga opisyal sang gobyerno, isa ka tikang nga nagapabakod sang transparency sa tunga sang mga alegasyon sang korapsyon sa mga proyekto sa imprastruktura.
