Nag-develop na sa bagyo ang isa ka low pressure area (LPA) sa guwa sang Philippine Area of Responsibility (PAR).
Sa latest bulletin sang state weather bureau, nakit-an ang tropical depression sa kalayuon nga 1,425 kilometers nasidlangan sang northeastern Mindanao. Dala sini ang kabaskugon sang hangin nga 45 km/h kag pagmadlos nga tubtub sa 55 km/h. Nagahulag ini pa-nakatundan sa kadasigon nga 15 km/h.
Magasulod ini sa PAR buwas sa aga ukon sa hapon kag kun diri na sa Pilipinas, pagatawgon ini nga Bagyo Tino.
Sa sulod sang PAR, magahulag si Tino pa-nakatundan samtang yara sa Philippine Sea. Sa forecast track, ang sentro sini maga-landfall sa Caraga ukon sa Eastern Visayas sa Martes sang aga. Magatabok ini sa Visayas kag Palawan sa tunga-tunga sang Martes kag Myerkules; kag pagkatapos, magatuhaw liwat sa West Philippine Sea sa Myerkules sang aga ukon sa hapon.
Magabaskog si Tino samtang yara sa Philippine Sea kag mahimo makalab-ot sa typhoon category sa Martes. Base sa intensity forecast, ang pinakamataas nga wind signal ang mahimo magdangat sa Wind Signal No. 4.
Sa pihak nga bahin, manubo ang tyansa nga mangin bagyo ang LPA nga diri sa sulod sang PAR.
Sa kabug-usan, ang bilog nga Visayas ang maka-eksperyensya sang magal-umon nga may mga lapta-lapta nga pag-ulan ukon thunderstorms bangud sa Intertropical Convergence Zone (ITCZ).
