Bilog na nga syudad kag probinsya sang Iloilo ang ginpasaka sa Wind Signal No. 4 base sa alas otso sa aga nga weather bulletin sang PAGASA.
Nabutang man sa Signal No. 4 ang Guimaras, Capiz, ang central kag southern portions sang Antique lakip ang Patnongon, Sibalom, Barbaza, Valderrama, Hamtic, San Jose, Bugasong, Culasi, Tibiao, Anini-Y, San Remigio, Belison, Tobias Fornier, kag Laua-An; amo man ang southern portion sang Aklan.
Signal no. 3 ang nabilin nga bahin sang Aklan kag ang nabilin nga bahin sang Antique lakip ang Caluya Islands.
Naka-landfall na ang bagyo sa Silago, Leyte; sa Borbon, Cebu; kag sa Sagay City, Negros Occidental kag gina-forecast nga maglaslas sa Visayas kag northern Palawan antes ini magtuhaw sa West Philippine Sea buwas sa aga.
Ulihi nga nakit-an ang sentro sang bagyo sa Sagay City, Negros Occidental dala ang kabaskugon sang hangin nga 150 km/h malapit sa sentro kag pagmadlos nga tubtub sa 205 km/h.
Nagahulag ini sa direksyon nga pa-nakatundan naaminhan nakatundan sa kadasigon nga 25 km/h.
Magaguwa ini sa Philippine Area of Responsibility buwas sa gab-i ukon sa Huwebes sang aga.
