Ginpasakaaan sang aso ang isa ka 70-anyos nga lalaki sa Italya matapos madiskubre nga nagpakuno-kuno siya nga bulag sa sulod sang 53 anyos agud padayon nga makabaton sang kapin €1 milyon (₱66 milyon) nga benepisyo halin sa gobyerno.
Suno sa report sang otoridad, nagsugod ang pagpanginto sang lalaki matapos nga gindeklarar nga “bulag” ini bangud sa isa ka insidente sa trabaho.
Humalin sadto, regular siya nga nakabaton sang disability payments.
Apang namutikan sang otoridad ang makaduluda nga impormasyon sa ila nga cross-checking system, gani ginpaidalom ini sa surveillance operation.
Paagi sa video recordings, nakita ang lalaki nga nagalagaw, nagaubra sa gwa sang ila balay nga kaangay nga makakita gid ini.
Matapos nakatipon sang mga ebidensya, ginpasaka ang kaso nga fraud batok sa iya.
Bilang resulta sang imbestigasyon, gilayon nga ginsuspinde ang tanan nga benepisyo sini sa social security kag welfare.
Ginpaidalom man siya sa tax audit, kun sa diin nakumpirma ang masobra €200,000 (₱13 milyon) nga ilegal nga kita sa nakaligad nga lima ka tuig nga amo ang panahon nga mahimo pa nga i-assess sa idalom sang layi.
