Magapartisipar sa hublag Protesta ang 86 ka mga diocese kag archdiocese sa Pilipinas agud mas ipabati sa gobyerno ang tingog sang mga pumuluyo nga kontra sa korapsyon.
Lakip diri ang Archdiocese of Jaro.
Sa interview sang Bombo Radyo kay Msgr. Meliton Oso, director sang Jaro Archdiocesan Social Center, iya gin-imbitar ang mga Ilonggo para sa pagahiwatun nga rally bwas nga adlaw nga ginapangunahan sang grupo nga Kahublagan Kontra Korapsyon.
Suno man sa iya, importante ang amo nga aktibidad agud mabuksan ang pinsar sang mga Pilipino sa korapsyon kag sa maanomaliya nga proyekto sang gobyerno.
Isa man ini ka panibag-o nga klase sang protesta bangud bangud magahiwat sang hublag-protesta halin sa prelature sang Batanes tubtub sa Jolo.
Maragtason man ini nga hitabo, bangud kun ikumparar ini sa EDSA People Power Revolution, ginpahayag ni Oso nga nakasentro lang ang anay nga protesta sa bahin sang Manila, apang sa subong, mas masangkad ang sakop sini kag bilog nga pungsod ang nagapakig-away batok sa korapsyon.
