Naglab-ot sa masobra 90 ka flights sang Jetstar ang ginkanselar kag madamo pa gid ang na-delay sa nagkalain-lain nga bahin sang Australia kahapon, Nobyembre 29.
Ini bangud sa gulpiyada nga global recall sang Airbus A320 aircraft para sa software repairs.
Sa interview sang Bombo Radyo kay Denmark Suede, former pilot kag International Correspondent, iya ginpahayag nga ang global recall nagresulta sang lapnagon nga disruptions sa operasyon sang madamo nga airline sa bug-os nga kalibutan.
Suno sa iya, kinahanglan ibalik sang mga aircraft engineers ang software sang mga eroplano sa mas daan nga version antes pa ini liwat pahanugutan nga makalupad.
Dugang pa niya, kada apektado nga aircraft ang kinahanglan i-ground sang duha tubtob tatlo ka oras agud matapos ang software fix.
Ginpahayag man sini nga kadam-an sang mga operator ang ginmanduan nga magbalik anay sa mas daan kag mas stable nga version sang Elevator and Aileron Computer (ELAC), software, samtang may pila ka aircraft naman nga kinahanglan gid nga ipa-idalom sa completo nga ELAC hardware replacement.
Pahayag pa Suede, sa bahin sang mas bag-o nga modelo sang Airbus 320 family, madasig lamang ang pag-update bangud software replacement lang ang kinahanglanon.
Apang para sa mas daan nga models, kinahanglan pa gid sang hardware replacement, kag ginabulubanta masobra 1,000 ka eroplano ang posible indi makalupad sa masunod pa nga pila ka semana samtang padayon ang pag-update sini.
Gin-athag man ni Suede nga kadam-an sa mga apektado nga Jetstar aircraft ang yara sa east coast sang Australia, rason nga nagdaku pa gid ang epekto sang flight cancellations sa nasambit nga pungsod.
