Nag-atubang na sa Independent Commission for Infrastructure (ICI) si House of Representatives Majority Leader kag Ilocos Norte 1st District Rep. Sandro Marcos subong nga adlaw, Disyembre 4.
Nagsumpa ang presidential son sa atubang sang panel, apang naghingyo ini sang executive session nga gin-aprubahan naman ni ICI chief Andres Reyes Jr.
Suno sa iya legal counsel, posible nga may mga kritikal nga impormasyon halin sa testimoniya sang kongresista.
Mahimo ini makaapekto sa dugang nga imbestigasyon sang komisyon gani nga gin-request nila ang executive session nga rason man kun ngaa gin-utod ang livestream.
“There may be critical information that may be illicited from his testimony which may jeopardize or compromise further investigation of this commission,” kabahin sang statement sang iya legal counsel nga yara sa iya likod sang nag-atubang siya sa ICI.
Nahibaluan nga nag-atubang si Sandro sa ICI matapos ginlawag siya ni resigned Ako Bicol Representative Zaldy Co nga nag-insert sang at least P50 billion nga balor sang public works projects sa national budget sang 2023, 2024, kag 2025.
Una naman nga gin-deny sang presidential son ang amo nga alegasyon.
Sa iya pagsumite sang iya kaugalingon sa panel subong nga hapon, ginklaro sini nga boluntaryo ang iya pagkadto, wala siya gin-subpoena, indi siya subject sang imbestigasyon, kag nagkadto lamang siya agud makabulig sa imbestigasyon.
 si Rep. Sandro Marcos subong nga adlaw, Disyembre 4.){kind=link}