Mangatubang sang kaso-kriminal ang kontrobersyal nga kontraktor nga si Cezarah Rowena “Sarah” Discaya kag ang iban pa nga mga personalidad nga naangot sa P96.5 million nga “ghost” flood control project sa Jose Abad Santos, Davao Occidental.
Sa video message ni President Ferdinand R. Marcos Jr., ginkumpirma sini nga nag-rekomendar ang Office of the Ombudsman sa pagpasaka sang kaso nga malversation paagi sa falsification kag paglapas sang Section 3(e) sang Republic Act 3019 ukon ang Anti-Graft and Corrupt Practices Act.
“Ayon sa imbestigasyon, ang proyektong ito na sinasabing natapos noong 2022 ay hindi kailanman nasimulan,” suno kay Marcos.
“Sa inspeksyon ng CIDG (Criminal Investigation and Detection Group) noong September 2025, natukoy na walang anuman konstruksyon na nasimulan hanggang ngayon,” pahayag pa sini. Dugang niya, ginkumpirma man sang indigenous groups kag barangay officials ang amo nga report.
Ang iban pa nga mga respondent amo sanday Ma. Roma Angeline Remando, mga tiglawas sang St. Timothy Construction Corp., kag mga personnel sang Department of Public Works and Highways (DPWH).
Wala sang pyansa ang kaso nga malversation, gani nga ginalauman na nga magpaguwa ang hudikatura sang arrest warrant batok kay Discaya kag sa iban pa nga respondents.
Suno kay Marcos, ginmanduan na sini ang Department of the Interior and Local Government (DILG) kag ang Philippine National Police (PNP) nga hibaluon kun sa diin si Discaya kag iban pa nga respondents agud nga madakop gilayon pananglitan makaguwa na ang warrant of arrest.
Pahayag sini, panugod pa lamang ini bangud madamo pa sang ipapreso kag madamo pa sang makasuhan antes ang Paskuwa.
“I have directed the DILG and the PNP to ensure that they know the whereabouts of Discaya at nung iba pa para paglabas ng arrest warrant ay maaresto sila aga… Umpisa pa lang ito. Marami pa tayong naipakulong at marami pang magpapasko sa kulungan,” dugang sang presidente.
